Reykjanesið gleymd perla

„Reykjanesið er bæði fallegt og fjölbreytilegt, það gleymist stundum að það er ekki bara hraunflákar eins og það sem maður sér út um bílrúðuna á Reykjanesbrautinni,“ segir Ellert Grétarsson ljósmyndari sem nýlega hlaut heimsathygli fyrir mynd sína af norðurljósum. „Myndina tók ég hérna á Reykjanesinu, ég tek flestar mínar myndir á því svæði.“

Ellert hefur tekið fjölda mynda og myndskeiða á Reykjanesskaganum. Hluta af þessu myndefni setti hann saman í myndskeið á vefnum youtube.com undir heitinu „Reykjanesskagi – Ruslatunna Rammaáætlunar“. Ellert segir að nafnið sé vísun í þegar Sigurður Þórarinsson jarðfræðingur stóð við Grænavatn í Krýsuvík og blöskraði svo umgengnin að hann sagði vatnið notað eins og ruslatunnu.

Í myndskeiðinu deilir Ellert hart á að samkvæmt rammaáætlun um orkunýtingu hafi meira og minna allir nýtingarkostir á svæðinu verið settir í framkvæmdaflokk eða biðflokk, og einungis þrír af 19 í verndunarflokk.

„Svo virðist sem Reykjanesið hafi verið notað sem pólitísk skiptimynt og gefið eftir að virkja það meira og minna allt en vernda þá frekar önnur svæði á hálendinu,“ segir Ellert.

Reykjanesið fallegur landshluti

Ellert segir miður hvað fáir geri sér grein fyrir þeirri náttúrufegurð sem Reykjanesskaginn búi yfir.

„Meðal fallegra útivistarsvæða eru Krýsuvík, sem er fólkvangur og eitt vinsælasta útivistarsvæðið í nágrenni við þéttbýlasta svæði landsins. Þarna er líka Trölladyngja og Eldvörp, tíu kílómetra löng gígaröð. Það þarf að fara alla leið upp í Lakagíga til að finna sambærilegar jarðmyndanir og Eldvörpin. Og þetta er nánast í bæjarhlaðinu. En þarna stendur því miður til að virkja. Ég er búinn að ljósmynda skagann í bak og fyrir undanfarin sex ár og fólk er hissa að sjá hvað náttúran hérna er falleg. Hér er til dæmis eini staðurinn í heiminum þar sem fyrirbærið úthafshryggur gengur á land með sýnilegum ummerkjum og þær jarðmyndanir sem fylgja því bjóða upp á mikil tækifæri í ferðaþjónustu, meira að segja í næsta nágrenni við alþjóðaflugvöll. Svo má ekki gleyma því að Reykjanesið er inngangurinn að landinu okkar og það fyrsta sem fólk sér á Íslandi. Við verðum að fara vel með það,“ segir Ellert.