Innlent | mbl | 5.4.2013 | 21:46 | Uppfært 22:25

Lögreglumenn sektuðu gesti í gríð og erg

Mynd 1 af 3 Þrír lögreglubílar og þrjú bifhjól voru í aðgerðinni í Ásgarði í Garðabæ í kvöld þar sem ökumenn fengu sektir sem ekki lögðu í hefðbundin bílastæði. mbl.is/Árni Sæberg

Mynd 2 af 3 Lögreglumaður skrifar sekt á bifreið sem ekki er lagt í skipulagt bílastæði. mbl.is/Árni Sæberg

Mynd 3 af 3 Menn lögðu á graseyjum og víðar þar sem koma mátti því við. mbl.is/Árni Sæberg

Lögreglan var á þremur lögreglubílum og þremur bifhjólum í Garðabæ í kvöld að sekta gesti í Ásgarði sem voru þar ýmist á körfuboltaleik Stjörnunnar og Snæfells eða á fimleikamóti vegna stöðubrota.

Vegna skorts á bílastæðum lögðu gestir gjarnan upp á graseyjar eða annars staðar þar sem þeir töldu sig koma því við.

Lögreglan fór á staðinn og sektaði ökumenn í gríð og erg og mega þeir nú búast við sekt upp á 5.000 krónur vegna stöðubrotsins.

Eins og sjá má á meðfylgjandi myndum hefur verið nóg að gera hjá lögreglumönnunum við sektarskriftirnar, en ekki er vitað hversu margir lögreglumenn voru á staðnum, hvort tveir hafi verið í hverjum bíl eða einn. Þeir hafa í það minnsta verið sex en hugsanlega níu.