Innlent | mbl | 16.4.2013 | 14:55 | Uppfært 17.4.2013 9:34

ESB viðræður hafa kostað 300 milljónir

Viðræðum við Evrópusambandið miðar hægar áfram en búist var við þegar sótt var um aðild. mbl.is/Kristinn Ingvarsson

Beinn bókfærður kostnaður við viðræður Íslands við Evrópusambandið nam alls 300,7 milljónum króna á árunum 2010 til og með 2012. Þetta er ríflega innan fjárheimilda Alþingis, samkvæmt því sem kemur fram í nýrri skýrslu Utanríkisráðuneytisins um stöðu og framvindu samningaviðræðnanna.

„Sá árangur hefur náðst með aðhaldi í ferða- og sérfræðikostnaði, og með tilfærslu starfsmanna og verkefna. Óbeinn kostnaður svo sem við þýðingar er þó nokkur,“ segir í tilkynningu ráðuneytisins um skýrsluna.

Viðræðum Íslands við ESB er lokið í 11 samningsköflum, þ.á.m. utanríkis-, öryggis- og varnarmálum. Enn standa hins vegar yfir viðræður um 16 samningskafla, þ.á.m. mikilvæga málaflokka á borð við orkumál, umhverfismál, efnahags- og peningamál og byggðamál.

Um 200 manns eiga sæti í samningahópum Íslands. Fram kemur í nýrri skýrslu Utanríkisráðuneytisins um stöðu og framvindu samningaviðræðnanna að góður andi ríki í samningaliðinu og náið samráða sé haft við Alþingi, sveitarfélög, hagsmunahópa og félagasamtök.

Ísland hefur þegar afhent samningsafstöðu sína í 29 af þeim 33 efnislegu samningsköflum sem viðræðurnar snúast um og á einungis eftir að fullgera samningsafstöðu sína í fjórum köflum. Þegar öll mál eru komin upp á samningaborðið hefst lokaáfangi viðræðnanna.

Áætlað er að samanlagður IPA-stuðningur við Ísland samkvæmt landsáætlunum 2011, 2012 og 2013 nemi 6,5 milljörðum króna en stuðningurinn gerir ráð fyrir ákveðnu mótframlagi Íslands. Markmið IPA er að styrkja íslenska stjórnsýslu og hrinda í framkvæmd verkefnum um allt land á sviði atvinnu- og byggðamála.

Skýrsluna má finna hér