Innlent | mbl | 3.5.2013 | 10:21 | Uppfært 15:51

Skilar sér ekki í buddu neytenda

Neytendasamtökin gagnrýna að styrking gengis krónunnar um 12,7% gagnvart evru á þremur mánuðum hafi ekki skilað sér til neytenda. Á þessu tímabili hafa innfluttar mat- og drykkjarvörur aðeins lækkað um 1,1%.

Á vef Neytendasamtakanna kemur fram að frá því í febrúar á þessu ári hefur krónan verið að styrkjast. Svo dæmi sé tekið var evran 172,96 kr. samkvæmt sölugengi Seðlabankans 1. febrúar sl. Þann 30. apríl sl. var sölugengið hinsvegar komið í 153,34 kr. Þannig hefur krónan styrkst um 12,7% gagnvart evru á þessu þriggja mánaða tímabili, segir á vef samtakanna.

„Neytendasamtökin hafa skoðað gögn frá Hagstofunni um verðbreytingar á nokkrum vöruflokkum matvæla á þessu sama tímabili og er miðað við tölur Hagstofunnar frá því í febrúar annars vegar og í apríl hins vegar. Þá kemur í ljós að innfluttar mat- og drykkjarvörur hafa aðeins lækkað um 1,1%. Grænmeti (innlent og erlent) hefur hækkað um 2,2%, búvörur án grænmetis um 2,2% og aðrar innlendar matvörur um 1,1%.

Það er því ljóst að verðbreytingar hafa ekki verið í samræmi við styrkingu krónunnar. Að sjálfsögðu skiptir styrkingin minna máli þegar um innlendar vörur er að ræða en innfluttar. Í mörgum tilvikum vegur hins vegar kostnaður vegna innflutts hráefnis þó nokkuð við framleiðslu á innlendum matvörum.

Neytendasamtökin hafa ítrekað krafist þess að framleiðendur, innflytjendur og seljendur séu sjálfum sér samkvæmir. Þegar krónan veikist hækkar verðlag tiltölulega fljótt. Á sama hátt er eðlilegt að verð lækki á sama hátt þegar krónan styrkist. Neytendur sætta sig ekki við annað,“ segir á vef Neytendasamtakanna.