Fjórum langreyðum var landað í Hvalstöðinni í Hvalfirði í gær. Hvalur 9 kom fyrst að landi um tíuleytið í gærmorgun með tvo hvali og svo kom Hvalur 8 með aðra tvo á fjórða tímanum í gær. Alls var búið að landa ellefu langreyðum í gærkvöldi frá því að hvalveiðivertíðin hófst viku fyrr.

„Þetta er þrusugangur. Það er frábær stemning hér í Hvalstöðinni, ekkert verri en í gamla daga,“ sagði Gunnlaugur F. Gunnlaugsson stöðvarstjóri í gær. „Þetta er alltaf sama tilfinningin.“ Hann sagði að hvalirnir sem komið var með í gær hefðu verið mjög góðir.

Unnið nótt og dag

Í Hvalstöðinni vinna 90 manns á átta stunda vöktum við hvalskurðinn. Stór hluti af þeim er skólafólk en einnig reyndir hvalskurðarmenn sem mæta þegar hvalveiðar eru stundaðar.

„Við erum með mikið af fólki sem hefur verið hér áður. Það kemur alltaf aftur og aftur,“ sagði Gunnlaugur í samtali við Morgunblaðið. 

Til stóð að vinna í alla nótt við að ganga frá hvölunum sem landað var í gær og endist vinnan við þá allan daginn í dag einnig, að sögn Gunnlaugs. Kjöt, rengi, spik og sporðar fara í frystingu. Beinin eru söguð niður og soðið úr þeim lýsi og síðan búið til mjöl úr þeim, innyflum og afskurði í Hvalstöðinni. Aðal-frystingin er í Hvalstöðinni en einnig vinna 30 manns við frystingu hvalaafurða á Akranesi og 15 í Hafnarfirði. Auk þess eru 26 manns í áhöfnum hvalbátanna tveggja, 13 á hvorum báti. Alls hafa því 161 vinnu við hvalveiðarnar í sumar að ótöldum þjónustustörfum við hvalveiðarnar. Fullráðið er hjá Hval hf., að sögn Gunnlaugs.

Tengdar fréttir

Hvalveiðar

„Er í mínum huga engin frétt“

• Ríkislögreglustjóri kannar málsatvik
• Jón „mun ekki koma nálægt meðferð hvalamálsins“
• 40% telja veiðarnar veikja stöðu Íslendinga
• Helmingur telur leyfisveitingu óeðlilega

» Fleiri tengdar fréttir