Búnir með makrílkvótann fyrir árið

Tveir af þremur ísfrystitogurum HB Granda hafa lokið við að veiða markílkvóta ársins. Þriðji togari fyrirtækisins mun klára sinn kvóta í næstu tveimur veiðiferðum sínum. Þetta kemur fram í frétt á vef HB Granda.

Otto N. Þorláksson RE fór fyrstur til veiða og var með um 130 tonn af makríl og síld í tveimur veiðiferðum. Ásbjörn RE kom til hafnar á Akranesi í morgun úr seinni veiðiferð sinni og var með svipaðan afla. Sturlaugur H. Böðvarsson AK fer til veiðanna í dag og verður makrílkvótinn tekinn í næstu tveimur veiðiferðum.

Haft er eftir Friðleifi Einarssyni, skipstjóra á Ásbirni, í frétt HB Granda að veiðarnar hafi gengið þokkalega að þessu sinni. Í tveimur fyrstu holunum hafi fengist hreinn makríll en síðan borið töluvert á íslenskri sumargotssíld sem aukaafla.

,,Við fórum lengst út um 120 mílur vestur af Akranesi. Lóðningar voru ágætar en það er erfitt að hitta á makrílinn án þess að fá líka síld sem meðafla. Ætli hlutfallið af henni hafi ekki verið um 25-30% af heildaraflanum,“ segir Friðleifur.

Samkvæmt upplýsingum Þrastar Reynissonar, vinnslustjóra HB Granda á Akranesi, hefur vinnsla á makríl frá ísfiskskipunum gengið ágætlega í sumar en hann segir helsta vandann fólginn í því að flokka síldina frá makrílnum.

,,Við erum búnir að taka á móti um 260 tonnum af makríl og síld í sumar. Hvort tveggja makríllinn og síldin eru heilfryst hjá okkur og vinnslu- og frystigetan er um 40 til 45 tonn á 10-12 tímum,“ segir Þröstur Reynisson í frétt HB Granda.

• 1 blogg um fréttina

Bloggað um fréttina

• Jóhann Elíasson: ÍSFRYSTITOGARI??????????