Haldi við girðingu endalaust

Innanríkisráðuneytið hefur hafnað kröfu landeiganda um að Vegagerðin endurnýi 40 ára gamla girðingu sem sett var upp þegar Hringvegurinn var lagður í gegnum land hans. Bóndinn hefur samkvæmt úrskurðinum þær skyldur að halda girðingunni við endalaust en getur sótt um stuðning Vegagerðarinnar við það.

Suðurlandsvegur liggur í gegnum land jarðarinnar Túns í Flóahreppi. Bjarni Stefánsson bóndi er með land beggja vegna vegarins og hlýst af því óþægindi og kostnaður, að því er fram kemur í fréttaskýringu um mál þetta í Morgunblaðinu í dag.

„Ég hef skilið þetta þannig að girðingin væri hluti af vegamannvirkinu og hún sé til þess að tryggja öryggi vegfarenda. Mér finnst það því ekki réttlátt að setja það í hendur einkaaðila að halda við þessum hluta mannvirkisins og um leið þá byrði að sjá um öryggi vegarins. Einkaaðilar eru látnir greiða fyrir þetta samfélagslega verkefni,“ segir Bjarni.