Innlent | mbl | 19.7.2013 | 9:34

Ástand sandsílastofnsins enn lélegt

Frá sandsílaleiðangri Hafrannsóknarstofnunar.

Ekkert bendir til þess að sandsílastofninn sunnan- og vestanlands sé að rétta úr kútnum, en til að það gerist verður nýliðun sandsílis að vera góð, sambærileg eða betri en árið 2007, nokkur ár í röð.

Ellefu daga sandsílaleiðangri Hafrannsóknastofnunar á rannsóknaskipinu Dröfn RE 35 lauk í gær. Farið var á fjögur svæði í Breiðafirði, Faxaflóa, svæðið við Vestmannaeyjar að Vík og svæði út af Ingólfshöfða. Þetta er áttunda árið sem farið er í slíkan leiðangur, en markmiðið er m.a. að meta breytingar í stofnstærð og afla upplýsinga um styrk árganga sandsílis.

Talsvert af seiðum en þau smærri og færri en í fyrra

Eins og í fyrra fékkst talsvert af seiðum í Faxaflóa, en nú var magnið minna og seiðin smærri. Á öðrum svæðum fékkst minna af seiðum. Við mat á nýliðun í stofninn hefur verið stuðst við fjölda eins árs sandsíla. Á síðasta ári varð nokkuð vart seiða og því eftirvænting að sjá hvernig seiðin mundu skila sér sem eins ár síli sumarið 2013, samkvæmt tilkynningu frá Hafró.

Í leiðangrinum á Faxaflóa 2012 fékkst mesti fjöldi seiða frá því að athuganir hófust árið 2006, en ekki er að sjá að þau skili sér sem eins ár síli svo nokkru nemi og því ekki að vænta betri nýliðunar í stofninn af árangi 2012.

Líkur á að þau hafi lent í afráni frá makríl, hvölum og sjófuglum

„Leiða má að því líkum að seiðin hafi strax lent í miklu afráni frá fiskum eins og makríl, hvölum og sjófuglum þó ekki liggi fyrir nein gögn þar að lútandi. Aðrar mögulegar skýringar á lélegri nýliðun gætu verið lítið æti, óhagstætt hitastig sjávar eða önnur umhverfisáhrif,“ samkvæmt upplýsingum frá Hafró.

Lítið fékkst af eldri sílum á öllum svæðum, enda eru þeir árgangar sem ættu að vera uppistaðan í stofninum mjög litlir og virðist 2007 árgangurinn sem hefur verið uppistaðan í stofninum undanfarin ár enn vera til staðar. Við eðlilegt ástand væri vægi þessa árgangs orðið óverulegt, en þetta er eini árgangurinn sem hefur skilað nýliðun sem eitthvað hefur kveðið að frá því athuganir hófust.

„Þessar fyrstu niðurstöður eru háðar óvissu því þær eru eingöngu byggðar á lengdarmælingum á síli en ekki á aldurslesningum. Vöxtur á milli ára er breytilegur hjá síli og einnig er mikill breytileiki í lengd eftir aldri innan árs og milli svæða. Á næstu mánuðum fara fram aldursgreiningar á sýnum ársins og frekari úrvinnsla,“ segir í tilkynningu frá Hafrannsóknarstofnun.

Það voru þeir Valur Bogason og Kristján Lilliendahl sem önnuðust þessar rannsóknir, en skipstjórn var í höndum Gunnar Jóhannssonar í fyrri hluta og Ásgeirs Guðbjartssonar í seinni hluta leiðangursins.