Endurskoða Mærudaga vegna óláta

„Í ljósi reynslu helgarinnar erum við að sjálfsögðu tilbúin að endurskoða fyrirkomulag þessarar bæjarhátíðar,“ segir Einar Gíslason framkvæmdastjóri Mærudaga sem haldnir voru á Húsavík um helgina.

Mikil ölvun var á hátíðinni, illindi og átök. Fjórar líkamsárásir komu á borð lögreglu, þar af ein alvarleg, og liggja kærur fyrir. Eftir aðfaranótt sunnudagsins voru allir fangaklefar lögreglu fullir.

Lögreglan á Húsavík segir að frá hennar bæjardyrum séð hefðu Mærudagar aldrei verið jafn erfiðir. Nærri 5.000 manns voru á Mærudögum, þar með taldir um 2.200 íbúar á Húsavík.