Voru líklega ekki í bílbeltum

Talið er að pólsku stúlkurnar tvær sem létust í bílslysinu á Suðurlandsvegi á sunnudag hafi ekki verið í bílbeltum þegar slysið átti sér stað. Að sögn lögreglu á Selfossi voru hinir tveir farþegarnir, ökumaður og farþegi í framsæti bifreiðarinnar, báðir í beltum.

Fólkið, kona og maður, voru flutt með þyrlum Landhelgisgæslunnar á Landspítalann. Karlmaðurinn, ökumaður bílsins, er nú á gjörgæsludeild spítalans og er hann að sögn læknis mikið slasaður. Konan, sem var farþegi í bifreiðinni, hefur nú verið útskrifuð af gjörgæsludeild og flutt á almenna deild.

Að sögn lögreglu á eftir að yfirheyra fólkið en ekki er vitað með vissu hvað olli slysinu. Talið er að ökumaðurinn hafi misst stjórn á bifreið sinni með þeim afleiðingum að tveir köstuðust út úr henni.

Stúlkurnar tvær, 15 og 16 ára, tengdust manninum og konunni fjölskylduböndum.

Frétt mbl.is: Kominn í öndunarvél eftir slysið

Frétt mbl.is: Tvær pólskar stúlkur létust í slysinu í gær

• 1 blogg um fréttina

Bloggað um fréttina

• Ómar Ragnarsson: Svo einfalt, og svo afdrifaríkt.