Láglaunastörfum fjölgar ört

Fækkun fólks á atvinnuleysisskrá virðist einkum bundin við þá sem hafa aðeins lokið grunnskólaprófi, en ríflega sextán sinnum fleiri í þeim hópi hafa farið af skránni en háskólamenntaðir.

Alls voru 4.319 á atvinnuleysisskrá í júní í fyrra með grunnskólapróf en þeim hefur nú fækkað um rúmlega þúsund og voru 3.283 í júní síðastliðnum. Til samanburðar voru 1.609 á atvinnuleysisskrá með háskólamenntun í júní 2012 en 1.546 í júní sl. Fækkaði þeim því um 63 milli ára, að því er fram kemur í Morgunblaðinu í dag.

Að sögn Karls Sigurðssonar, sérfræðings hjá Vinnumálastofnun, má draga þá ályktun af fjölgun starfa innan mismunandi aldurshópa að láglaunastörfum hjá ungu fólki hafi fjölgað meira en betur launuðum störfum háskólamenntaðs fólks.