Enski boltinn hækkar um 28%

Stöð 2 Sport 2 hefur hækkað áskriftagjald um 28% og er mánaðarlegt áskriftargjald nú 8.990 krónur. Ari Edwald forstjóri 365 segir að hækkunina megi rekja til samkeppni í útboði og segir hann fyrirtækið borga nú rúmlega 30% hærra verð fyrir sýningarréttinn á enska boltanum en það gerði í fyrra.

„Einfalda skýringin er sú að í nýjum samningi sem gerður var hækkaði innkaupsverð meira en sem þessari hækkun nemur. Mikil samkeppni var frá innlendum aðila og verðið hækkaði um meira en 30% af þeim sökum,“ segir Ari.

Hann segir að fyrirtækið muni áfram verða með sama fjölda leikja og var á síðasta ári auk þess sem stefnan sé sett á að bæta við sérfræðingum og leikrýnum.

Þá segist hann ekki hafa orðið var við mikla óánægju hjá viðskiptavinum. „Viðskiptavinir eru aldrei ánægðir með verðhækkun, en ég held að þeir hafi sýnt þessu skilning,“ segir Ari og bendir á að fyrirtækið hafi gert ráðstafanir til þess að koma til móts við viðskiptavini með betri kjörum á internetþjónustu og heimasíma samhliða áskrift á sjónvarpsstöðinni.

Ari Edwald, forstjóri 365 miðla. Ómar Óskarsson

• 3 blogg um fréttina

Bloggað um fréttina

• Óskar: Bless enski á stöð 2 - þetta læt ég ekki …
• Axel Jóhann Axelsson: Láta boltaaðdáendur bjóða sér hvað sem er?
• Jóhann Elíasson: ALLT SEM STÖÐ 2 SETUR KLÆRNAR Í FER TIL ANDSKOTANS..............