Yfir 18 þúsund undirskriftir

Alls hafa rúmlega 18.100 skrifað undir áskorun um að flugvöllurinn verði áfram í Vatnsmýrinni.

Á föstudagsmorgun setti félagið Hjartað í Vatnsmýrinni af stað undirskriftasöfnun til stuðnings Reykjavíkurvelli á vefnum www.lending.is. Þar er skorað á Reykjavíkurborg og Alþingi að tryggja óskerta flugstarfsemi í Vatnsmýri til framtíðar.

Undirskriftirnar verða afhentar borgarstjórn áður en frestur til að gera athugasemdir við tillögu að nýju aðalskipulagi rennur út hinn 20. september, en samkvæmt skipulaginu er gert ráð fyrir að flugvöllurinn víki úr Vatnsmýri.

Njáll Trausti Friðbertsson, flugumferðarstjóri og annar formaður félagsins, segir málið vera mikilvægt hagsmunamál landsmanna allra og telur undirskriftasöfnunina vera öflugan vettvang fyrir landsmenn til að tjá sig um málið.

„Við vorum með ýmsar hugmyndir til að vekja athygli á málinu og við töldum þessa leið henta mjög vel. Þetta er mjög skýr leið fyrir landsmenn til að koma fram með sína skoðun á málinu og við hvetjum alla til að skrifa undir,“ segir Njáll.

Félagið Hjartað í Vatnsmýri var stofnað hinn 8. júlí 2013 í þeim tilgangi að berjast fyrir því hagsmunamáli að tryggja óskerta flugstarfsemi í Vatnsmýri. Í stjórn félagsins eru 14 manns víða að af landinu og formenn eru þeir Friðrik Pálsson hótelhaldari og Njáll Trausti Friðbertsson flugumferðarstjóri.

• 3 blogg um fréttina

Bloggað um fréttina

• Óðinn Þórisson: Gísli Marteinn verði EKKI á lista Sjálfstæðisflokksins
• Gunnar Heiðarsson: Góður gangur
• Sigmar Þór Sveinbjörnsson: Flugvöllinn áfram í Vatnsmýrinni