Býflugurnar sluppu út

Býflugur sem flytja átti til Íslands á vegum Býflugnafélags Íslands frá Álandseyjum sluppu út þegar verið var að flytja þær með flugi frá Finnlandi. Ástæðan er sú að seljandinn gekk ekki nægilega vel frá þeim fyrir flutninginn.

Greint er frá þessu á vef  Bændablaðsins og nánar í blaðinu sem kemur út á morgun.

Undanfarin ár hefur Býflugnafélag Íslands (Bý) flutt inn býflugur frá Álandseyjum. Innflutningurinn gekk ekki vel í ár. Ætlunin var að flytja inn 48 bú með flugi frá Finnlandi, en illa var gengið frá umbúðunum þannig að rúmlega helmingur býflugnanna slapp út.

Egill Sigurgeirsson, formaður félagsins, segir í samtali við Bændablaðið að því miður hafi þetta gerst, en ábyrgðin liggi hjá seljandanum sem beri allt fjárhagsleg tjón. Eftir sitji íslenskir býflugnaræktendur með sárt ennið. Hann segir að nýir félagsmenn hafi verið látnir ganga fyrir með þau bú sem lifðu ferðalagið af.

• 3 blogg um fréttina

Bloggað um fréttina

• ÞJÓÐARSÁLIN: Banna býflugnarækt hérlendis!
• Ásgrímur Hartmannsson: Hvernig var að taka á móti þessari vél?
• Ómar Ragnarsson: Minkarnir sluppu út, - Titanic sökk, ... "ekkert bilað...ekkert bilað..."