Mótmæla ákvörðun Eyglóar

„Stjórn  NPA-miðstöðvarinnar mótmælir ákvörðun félagsmálaráðherra harðlega,“ segir í yfirlýsingu frá stjórn-NPA miðstöðvarinnar á Íslandi, en Eygló Harðardóttir, félagsmálaráðherra, tók nýlega þá ákvörðun að skipa nýjan nefndarformann og mun Guðmundur Steingrímsson, þingmaður Bjartar framtíðar, því ekki gegna hlutverkinu lengur. 

Stjórn NPA-miðstöðvarinnar fer fram á að félagsmálaráðherra svari fyrir þessar breytingar, þar sem rökstuðningur liggur ekki fyrir, og endurskoði ákvörðunina jafnframt tafarlaust.

Alvarlegt að skipta um formann á svo viðkvæmu stigi

Í tilkynningunni kemur fram að Guðmundur hafi haft frumkvæði að því að leggja fram þingsályktunartillögu um innleiðingu notendastýrðrar persónulegrar aðstoðar í samstarfi við fulltrúa allra þingflokka og var tillagan samþykkt með öllum greiddum atkvæðum.

„Samráð formanns  við  fatlað  fólk og einlægur áhugi á NPA hefur verið sérstaklega eftirtektarvert  að  mati  stjórnar NPA-miðstöðvarinnar og verið verkefninu til  fyrirmyndar.  Vinnan  hefur  gengið vel og árangurinn er augljós en um fimmtíu  NPA-samningar hafa verið gerðir víða um land og hafa umturnað lífi fjölda fatlaðs fólks sem nú býr við aukið frelsi og sjálfstæði.“

Í  ljósi  þess  að  um er að ræða afmarkað þriggja ára tilraunaverkefni sem lögum  samkvæmt  skal  leiða  til  lögfestingar NPA telur stjórnin alvarlegt að skipta um formann  á  svo  viðkvæmu  stigi.  Einungis  ár  er  eftir  af tilraunaverkefninu  og  telja þau nauðsynlegt að verkefnisstjórnin haldist óbreytt  svo varðveita megi þá sérþekkingu og reynslu sem skapast hefur.