Bretti upp ermarnar og láti verkin tala

Neytendasamtökin segja það ábyrgð stjórnvalda að sjá eignalausu fólki og leigjendum fyrir viðráðanlegum kostum í húsnæðismálum. Ekki verði annað séð en vilji stjórnvalda, og allra flokka, standi til þess að gera leigu að raunhæfum valkosti en því miður hafi ekkert enn gerst í þessum efnum.

Á vefsvæði samtakanna er fjallað um þá umræðu sem verið hefur hávær að undanförnu um skort á leiguhúsnæði hér á landi. Einnig að leiga hafi hækkað mjög.

„Með hliðsjón af vaxandi eftirspurn eftir leiguhúsnæði á sama tíma og framboðið er lítið er ekki að undra að húsaleiga heimila hafi hækkað verulega. Neytendasamtökin hafa ítrekað kallað eftir auknu framboði á leiguhúsnæði á viðráðanlegum kjörum,“ segir í frétt Neytendasamtakanna. 

Þá segir að afar rík þörf sé á því að leigjendum standi til boða öruggt langtímaleiguhúsnæði á viðráðanlegum kjörum. Neytendasamtökin ætlast því til að stjórnvöld, bæði ríkisvaldið og sveitarfélög, bretti upp ermarnar og láti verkin tala. „Þörfin er alla vega gríðarleg.“

• 1 blogg um fréttina

Bloggað um fréttina

• Guðni Karl Harðarson: Bú er betra þótt lítið sé, halur er heima hver