Lykilatriði að örva fjárfestingu

„Við náum aldrei viðvarandi hagvexti á Íslandi þegar fjárfestingin er svona veik. Það er algert lykilatriði að örva hana.“

Þetta segir Þorsteinn Víglundsson, framkvæmdastjóri Samtaka atvinnulífsins í samtali í Morgunblaðinu í dag.

Hagstofa Íslands birti tölur í gær þar sem fram kemur að fjárfesting dróst saman um 13% á fyrstu sex mánuðum ársins. Samdráttinn miðað við sama tíma í fyrra megi þó að miklu leyti rekja til mikils innflutnings á skipum og flugvélum sem þá átti sér stað. Ef horft er framhjá fjárfestingu í skipum og flugvélum, jókst fjárfesting hér á landi um 4,1%.