Veghefill ók upp á fólksbifreið

Mildi þykir að ekki skuli hafa orðið slys á fólki þegar veghefli var bakkað upp á fólksbifreið skammt sunnan við bæinn Breiðabólstað við rætur Bröttubrekku nú í morgun.

Verið er að rífa upp klæðningu á stuttum vegarkafla á svæðinu og var hefillinn við þá vinnu þegar óhappið varð. Þetta kemur fram á Búðardalur.is.

Þar segir að svo virðist sem veghefilsstjórinn hafi ekki séð fólksbifreiðina sem var á vesturleið og bakkaði hann því upp á hana. Sjá má á meðfylgjandi ljósmyndum hvar tennur aftan á vegheflinum gengu í gegnum framrúðuna bílstjóramegin.

Þá kemur fram að bifreiðin hafi verið óökufær eftir óhappið og var hún dregin burt með kranabifreið.

• 2 blogg um fréttina

Bloggað um fréttina

• Eyjólfur Jónsson: Ekki kenna veghefilstjóranum um áreksturinn!!
• Njörður Helgason: Blind baksýn.