Dregur úr áfengisneyslu ungmenna

Dregið hefur úr áfengis- og vímuefnaneyslu unglinga. Þetta kemur fram í Rannsókn á vímuefnanotkun framhaldsskólanema á Íslandi árið 2013, sem Rannsóknir og greining við Háskólann í Reykjavík framkvæmdu.

Vímuefnaneysla hefur minnkað gríðarlega meðal unglinga í efstu bekkjum grunnskóla undanfarin 15 ár, að því er fram kemur í fréttaskýringu um þetta mál í Morgunblaðinu í dag.

Þá hefur hún einnig minnkað verulega meðal nemenda í framhaldsskólum frá árinu 2000. Til samanburðar er ölvunardrykkja nemenda, 16 og 17 ára í framhaldsskólum í ár, 2013 um 35%, en árið 1998 var hún 42% í 10. bekk. Stærsta stökkið í neyslu verður þegar einstaklingur hefur nám í framhaldsskóla.