Regnbogamessa í Laugarneskirkju

„Okkur langar bara að opna dyrnar fyrir þeim sem ekki eru boðnir á þessa hátíð, sem er hinsegin fólk. Við tökum mjög skýra afstöðu, þetta er ekki í okkar nafni sem þessi maður er að tala,“ segir Sigurvin Lárus Jónsson, prestur Laugarneskirkju, en kirkjan leggur ekki nafn sitt við heimsókn Franklins Grahams á Hátíð vonar sem nú fer fram í Laugardalshöll og mótmælir guðfræði hans.

Regnbogafáni blaktir nú við hún fyrir utan kirkjuna og hefur gert síðan í morgun. Sigurvin Lárus sækir ekki Hátíð vonar, né þeir sem standa að þessari ályktun í sóknarnefnd kirkjunnar.

Í kvöld, sunnudagskvöldið 29. september, kl. 20.00 verður haldin regnbogamessa í Laugarneskirkju. Um er að ræða guðsþjónustu þar sem hinsegin fólk og ástvinir þess eru sérstaklega boðin velkomin til kirkju. Yfirskrift messunnar er: Fögnum fjölbreytileika - krefjumst mannréttinda. Sigurvin Lárus sér um messuna og aðalræðumaður kvöldsins verður Aðalbjörg Stefanía Helgadóttir. Aðalbjörg, sem er fomaður sóknarnefndar, mun þar segja opinberlega í fyrsta sinn sögu föður síns, Helga Jósefssonar Vápna, en hann var um tíma forstöðumaður hvítasunnukirkjunnar á Vopnafirði, kom út úr skápnum á miðjum aldri og tók líf sitt m.a. sökum fordóma sem hann mætti meðal trúsystkina sinna. Þá mun Hinsegin kórinn syngja í kirkjunni.

Boðskapur kristinna manna um að samkynheigð sé synd veldur gríðarlegri þjáningu

„Það er sannfæring mín að sá boðskapur kristinna manna í samtímanum að samkynhneigð sé synd sé valdbeiting og mannréttindabrot. Sú afstaða réttlætir og veldur gríðarlegri þjáningu í heiminum og kyndir undir ofsóknum og ofbeldi á hendur hinsegin fólki. Í ljósi sögunnar mun hún flokkast með stuðningi kirkna við þrælahald, kynþáttaaðgreiningu (apartheid) og kvenfyrirlitningu,“ segir Sigurvin Lárus í prédikun sinni sem lesa má á tru.is.

Þá segir einnig í prédikuninni: „Um þessa helgi njótum við heimsóknar manns sem hefur gríðarleg völd, en hann er erfingi eins farsælasta sjónvarpstrúboðs sögunnar og er metinn á annan milljarð íslenskra króna. Enda hafa auglýsingar og íburður komu hans borið þess merki. Þjóðkirkjan hefur auglýst þennan viðburð, nokkrir þjóðkirkjusöfnuðir taka þátt í hátíðinni og hann segist í kastljósviðtali vera hér í boði 80% kirkna landsins (Kastljós 27. september 2013). Þær kirkjur hafa ekki verið uppgefnar en sóknarnefnd og sóknarprestur Laugarneskirkju hefur lýst því yfir opinberlega að hann er ekki hér í okkar boði og við leggjum ekki nafn okkar við þann boðskap sem hann prédikar. Guðfræði þessa manns er amerísk bókstafshyggja sem er íslensku þjóðkirkjunni fullkomlega framandi, menningarlega, stjórnmálalega og guðfræðilega.“