Innlent | mbl | 6.10.2013 | 13:25 | Uppfært 17:59

Ummæli forsætisráðherra óskiljanleg

Katrín jakobsdóttir og Árni Páll Árnason stinga saman nefjum á Alþingi. mbl.is/Eggert Jóhannesson

Árni Páll Árnason, formaður Samfylkingarinnar, segir að ummæli Sigmundar Davíðs Gunnlaugssonar forsætisráðherra um fjárlagafrumvarpið verði sífellt óskiljanlegri.

„Hann gafst upp á að tala fyrir fjárlagafrumvarpinu áður en fjármálaráðherrann náði að mæla fyrir því. Aldrei áður hefur forsætisráðherra gefist svo hratt upp á að réttlæta ráðstafanir í fjárlagafrumvarpi, segir Árni Páll á Facebook síðu sinni í dag.

Stjórnarandstaðan að ákveða forgangsröðun fjárlaga?

„Nú segir hann að stjórnarandstaðan eigi að ákveða forgangsröðun í fjárlagafrumvarpinu,“ bætir Árni Páll við og vísar í ummæli Sigmundar Davíðs á fundi kjördæmaráðs Framsóknarflokksins í NA-kjördæmi í gær, þar sem hann sagði að eitt og annað þyrfti að laga í frumvarpinu og að það mundi auðvitað breytast í meðförum þingsins.

„Það getur vel verið að í fjárlagavinnunni finnist leiðir til að forgangsraða enn frekar í þágu heilbrigðisþjónustunnar,“ sagði forsætisráðherra m.a. í gær og talaði sérstaklega um möguleikann á að „finna annars staðar“ þær 200 milljónir sem ætlað væri að legugjöld skiluðu Landspítalanum.

„Ég á allt eins von á því að fjárlaganefndinni takist að finna út úr þessu,“ sagði Sigmundur Davíð á kjördæmisþinginu.

Árni Páll segir að stjórnarandstaðan sé svo sem alveg til í það að ákveða forgangsröðun í fjárlagafrumvarpinu. „[En] veltum þá fyrir okkur hvort meirihlutinn sé þá tilbúinn að afla tekna frá vinum sínum, t.d. með hækkun veiðigjalds?

Og ef svo er, til hvers er þá ríkisstjórnin?“