Gjald fyrir að skoða Geysi

Landeigendafélagið Geysir ehf., sem á meirihluta lands við Geysi í Haukadal, hyggst á fyrri hluta næsta árs hefja innheimtu gjalds af ferðamönnum sem sækja svæðið.

Í tilkynningu um þessi áform er ástæðan sögð vera sú að með öðru móti verði ekki farið í nauðsynlegar og kostnaðarsamar úrbætur á svæðinu.

Garðar Eiríksson, ritari Geysis ehf., segir að ekki sé búið að ákveða hve hátt gjaldið verður. Segir hann að um hálfan milljarð króna þurfi til uppbyggingar á svæðinu og gerir hann ráð fyrir því að innlendir jafnt sem erlendir ferðamenn verði rukkaðir.