ASÍ kynnir „betri leið“ til að lækka tekjuskatt

ASÍ telur eðlilegt að stjórnvöld nýti þá fjármuni sem verja eigi til skattalækkunar til að koma betur til móts við fólk með millitekjur og þá sem séu með lægri tekjur. Skilvirkasta leiðin til þess sé að hækka mörkin þar sem miðþrep tekjuskattsins byrjar. Þetta sé betri leið en leið stjórnvalda til að lækka tekjuskatt á þorra launafólks.

Fram kemur á vef ASÍ, að ríkisstjórnin hafi lagt til að skattprósentan í miðþrepi tekjuskatts verði lækkuð um 0,8 prósentustig, úr 25,5% í 25,0% (staðgreiðsluhlutfallið úr 40,22% í 39,42%). Áætlað tekjutap ríkissjóðs af þessari aðgerð séu um 5 milljarðar.

„Samkvæmt tillögunni byrja skattar einstaklings að lækka við 255.000 kr. skattskyldar tekjur. Skattalegur sparnaður einstaklings vex síðan þar til 781.000 kr. skattskyldum tekjum er náð og hafa þá mánaðarlegar skattgreiðslur viðkomandi lækkað um 4.207 krónur. Einungis þeir einstaklingar sem eru með skattskyldar tekjur yfir 781.000 (813.500 með 4% framlagi launamanns í lífeyrissjóð) fá notið þessarar skattalækkunar að fullu,“ segir í tilkynningu ASÍ.

Mánaðartekjur undir 350.000 skattlagðar í neðsta skattþrepinu

ASÍ telur að í stað þess að tryggja einungis þeim tekjuhæstu fullan ábata af skattalækkun sé að eðlilegra nýta þá fjármuni sem verja á til lækkunarinnar til þess að koma betur til móts við fólk með millitekjur og þá sem eru með lægri tekjur.

„Skilvirkasta leiðin til þess er að hækka mörkin þar sem miðþrep tekjuskattsins byrjar. Áætla má að það hefði sömu tekjuáhrif á ríkissjóð að hækka mörkin um nálægt 100.000 kr. á mánuði þannig að skattskyldar tekjur undir 350.000 kr. á mánuði yrðu skattlagðar í neðsta skattþrepinu. Þessi útfærsla á skattalækkun kæmi þorra launafólks betur en tillaga ríkisstjórnarinnar. Skattalegur ávinningur þeirra sem eru á tekjubilinu 255.000 til 350.000 yrði meiri en ef skattprósentan lækkaði þar sem skattprósentan á bilinu 255.000 til 350.000 kr. lækkaði um 2,9 prósentustig í stað 0,8% prósentustiga. Skattgreiðslur einstaklings með skattskyldar tekjur yfir 350.000 kr. myndu lækka um 2.726 kr. á mánuði.

Þeir sem eru með mánaðarlegar tekjur undir 625.000 (með 4% framlagi launamanns í lífeyrissjóð) koma betur út samkvæmt tillögu ASÍ. Það er því ljóst að það kemur þorra launafólks betur að hækka mörk miðþrepsins frekar en að lækka skattprósentuna,“ segir á vef ASÍ.

• 1 blogg um fréttina

Bloggað um fréttina

• Páll Vilhjálmsson: Samspil við ASÍ er besti leikur ríkissstjórnarinnar