Innlent | Morgunblaðið | 20.11.2013 | 5:30 | Uppfært 5:58

Hluti farþeganna vildi halda ferðinni áfram

Hópferðabifreiðin var á hægri ferð enda svell á veginum. Hún rann út af veginum undan vindinum og þar feykti vindhviða henni á hliðina. mbl.is/Sigmundur Sigurgeirsson

Hluti farþega úr rútu sem fór á hliðina á Þingvallavegi í gær vildi ljúka ferðinni að Gullfossi og Geysi.

Veður og aðstæður voru hins vegar þannig að það þótti ekki ráðlegt og fóru flestir heim á hótel í Reykjavík. Tveir farþegar urðu fyrir meiðslum sem talin voru minniháttar.

Hópferðabifreið frá Kynnisferðum var með 45 erlenda ferðamenn ásamt bílstjóra og leiðsögumanni í hefðbundinni skoðunarferð um Þingvelli og að Gullfossi og Geysi. Mikil hálka var á Þingvallavegi við Hakið og rok og tók svo mikið í að rútan rann út af veginum og valt. Margir farþegar voru í bílbeltum og telur lögreglan að það hafi átt þátt í að ekki slösuðust fleiri.