„Við höldum áfram á morgun. Við getum ekki látið tvo milljarða drepast þarna aftur,“ segir Kristinn Ólafsson, smábátasjómaður í Grundarfirði, en hann hefur verið við síldveiðar á bát sínum Björt.

„Þetta hefur gengið vel,“ segir Kristinn en hann var að landa í Grundarfirði þegar mbl.is ræddi við hann. Síldin fer til vinnslu á Akranesi. „Ég fer aftur á morgun ef veður leyfir. Mér finnst ekki annað hægt en að reyna að bjarga þessum verðmætum. Það er óhemju af síld þarna. Mér kæmi ekki á óvart þó þetta væru 100 þúsund tonn.“

Kristinn sagði að veiðarnar hefðu gengið vel í morgun. Um miðjan daginn hefði dregið úr veiðinni, eins og oft gerist, en aukist síðan aftur þegar kvöldaði.

Ljós komin á brúna

Kristinn segir ekkert stórmál að fara undir brúna á Kolgrafafirði ef menn fari varlega. Ljós voru sett upp á brúna í dag og segir Kristinn það vera til bóta.

Bæjarstjórnir Grundarfjarðar og Stykkishólms, funduðu í morgun, með hagsmunaaðilum, þar sem m.a. var rætt um þann möguleika að koma upp löndunaraðstöðu í Kolgrafafirði. Sigurborg Kr. Hannesdóttir, forseti bæjarstjórnar í Grundafirði, segir þetta vera áfram til skoðunar. Endanlega ákvörðun um hvort farið verði út í þetta verði ekki tekin fyrr en á mánudaginn. Menn vilji m.a. heyra í sjómönnum og meta reynslu þeirra af veiðunum.

Kristinn hvetur til þess að reynt verði að koma upp löndunaraðstöðu í firðinum. Arnar Kristinsson, sjómaður á Kidda RE, segir einnig til bóta að koma upp löndunaraðstöðu, en hann segir að áður þurfi að liggja fyrir hvort frjálsar veiðar í Kolgrafafirði séu einungis hugsaðar í fjóra daga eins og reglugerð ráðuneytisins gerir ráð fyrir eða til lengri tíma.

Síldin ekki á leið úr firðinum

Arnar og Kristinn eru sammála um að ósennilegt sé að síldin syndi út úr firðinum. Arnar segir að þegar síld hafi gengið inn í fjörðinn hafi hún annað hvort verið þar fram í mars og synt þá út eða drepist í firðinum.

Sigurborg segir að 12 bátar hafi verið við síldveiðar í Kolgrafafirði í dag. Fjórir hafi landað í Grundarfirði, en hinir hafi farið til Stykkishólms, en þar er verið að vinna síld.

Arnar segist eiga von á að fleiri bátar fari til síldveiða í Kolgrafafirði á morgun.