Féll fyrir skotum lögreglu
Setja bókamerki
Aðgerð lögreglunnar í Hraunbæ í morgun á sér enga hliðstæðu. Byssumaðurinn skaut á lögreglumenn. Skot hans hafnaði m.a. í hlífðarskildi lögreglumanns og féll hann niður stiga. Ákveðið var að rýma íbúðir í stigaganginum í kjölfarið. Maðurinn skaut síðar í höfuð lögreglumanns. Hann féll við en var með hjálm og slapp án mikilla meiðsla. Skot fóru fram hjá höfðum annarra lögreglumanna.
Lögreglan skaut þá byssumanninn sem lést af sárum sínum á sjúkrahúsi. Hann var vopnaður haglabyssu. Ljóst er að almennir lögreglumenn sem fóru fyrst á staðinn voru í mikilli hættu.
Lögreglan skaut m.a. gassprengjum inn um glugga á íbúðinni til að reyna að yfirbuga manninn. Maðurinn hóf þá að skjóta út um glugga íbúðarinnar.
Þetta kom fram í máli Stefáns Eiríkssonar, lögreglustjóra lögreglunnar á höfuðborgarsvæðinu, á blaðamannafundi sem hófst rétt eftir kl. 11.
„Lögreglan harmar þennan atburð og vill koma á framfæri innilegum samúðarkveðjum til fjölskyldu mannsins,“ sagði Haraldur Johannessen, ríkislögreglustjóri á blaðamannafundinum.
„Hörmulegur atburður,“ sagði Haraldur við upphaf blaðamannafundarins.
„Haft var samband bæði við innanríkisráðherra og ríkissaksóknara vegna þessa atviks sem á sér ekki fordæmi hér á landi,“ sagði Haraldur. Ríkissaksóknari mun fara með rannsókn málsins.
Í máli Stefáns Eiríkssonar kom fram að lögreglumenn frá lögreglunni á höfuðborgarsvæðinu voru sendir á staðinn vegna hávaða, hárra hvella, sem nágrannar heyrðu. Það var um kl. 3 í nótt. Sérsveitarmenn voru þegar kallaðir til.
Særðu manninn lífshættulega
Þegar lögreglumenn reyndu að hafa samband við íbúann heyrðist ekkert frá honum. Sérsveitin bjó sig undir inngöngu en þegar þeir fóru inn í íbúðina var skotið á þá. Skotið lenti í hlífðarskildi sem sérsveitarmaður var með, „hann féll við og niður stiga við þessa atlögu,“ sagði Stefán.
Lögreglan dró sig þá til baka og kallaði út aukinn liðsstyrk. Í framhaldi var farið í að rýma íbúðir í stigaganginum og þeim aðgerðum var lokið um kl. 5 í nótt.
Tilraunir til að hafa samband við manninn báru engan árangur og var reynt að yfirbuga hann með að skjóta gasi inn, hófst sú aðgerð um kl. 6 í morgun. Það bar ekki heldur árangur. Maðurinn brást við með því að skjóta út um glugga á íbúðinni. Í framhaldi af því var ákveðið að fara inn í íbúðina. „Til að tryggja öryggi allra á vettvangi voru sjúkrabifreiðar kallaðar út og allt tiltækt lögreglulið á svæðinu fór á vettvang.“
Stefán segir að tilraunir til að hafa samband við manninn hafi engan árangur borið. Því var reynt að yfirbuga hann með beitingu gasvopna sem skotið var inn í íbúðina. „Það bar ekki árangur og hóf maðurinn við það að skjóta út um glugga á íbúðinni.“
Þegar lögreglan fór inn í íbúðina skaut hann aftur á þá, í höfuð eins sérsveitarmanns, sem var með hjálm og sakaði ekki. Í kjölfarið var byssumaðurinn særður lífshættulega.
Það er ljóst að meiðsli lögreglumannanna eru ekki alvarleg en þeir hlutu þó ákveðin meiðsli að sögn Stefáns. Þeirra búnaður og þjálfun hafi komið í veg fyrir að þarna fór ekki verr.
Milli 15 og 20 lögreglumenn, auk sérsveitarmanna, tóku þátt í aðgerðinni. Tveir sérsveitarmenn slösuðust í aðgerðinni, annar fékk skot í andlit og hönd, en hann féll niður stiga eins og áður sagði. Almennir lögreglumenn og sérsveitarmenn mættu á vettvang á sama tíma.
Að sögn vitnis heyrðust fyrstu hvellirnir um klukkan eitt í nótt, en lögreglu barst ekki tilkynning um málið fyrr en klukkan þrjú. Aðgerðir lögreglu, frá því að hún kom á vettvang og þangað til maðurinn var færður í sjúkrabíl, stóðu milli þrjú í nótt og sjö í morgun.
Lögreglumenn með stóra riffla með öflugum sjónaukum komu sér fyrir á svokölluðum sjónpóstum til móts við íbúð mannsins, þar sem þeir eru manna færastir í að fylgjast með atburðum við þessar aðstæður. Ekki fékkst gefið upp hvort þeir hefðu skotið á manninn, en ljóst er að hann féll fyrir skotum lögreglu.
Jón Bjartmarz, yfirmaður sérsveitarinnar, sagði að lögreglan hefði brugðist rétt við aðstæðunum og farið að öllu eftir settum viðmiðum.
Hvað gerðist eiginlega í VMA?
Tekist á um áður óþekkta skýrslu landlæknis
Hraunið náð Njarðvíkuræð: Fylgjast með raflínu
Erlendir miðlar greina frá tíunda gosinu
Á algjöru frumstigi eftir þrjár vikur af verkfalli
Óttast að fólk fari aftur að eyða peningum
Heitt vatn fannst sem gæti annað 10 þúsund manns
Búseta skortir byggingarlóðir