Gætu tekið tvöfalt fleiri á samning í málmiðnaði

Fyrirtæki í málmiðnaði gætu boðið helmingi fleiri iðnnemum upp á námssamning sem lýkur með sveinsprófi.

Nú eru um 80 nemendur á samningi í málmtækni en hægt væri að taka við allt að 150, samkvæmt þeim upplýsingum sem Katrín Dóra Þorsteinsdóttir, forstöðumaður hugverka og mannauðs hjá Samtökum iðnaðarins, hefur fengið frá fyrirtækjum í málmiðnaði.

Viðvarandi skortur hefur verið á fólki með menntun í málmtækni undanfarin ár. Skortur er í fleiri greinum, s.s. í rafiðnaði en staðan er mismunandi á milli iðngreina. Í umfjöllun um mál þetta í Morgunblaðinu í dag segir Katrín Dóra, að kannanir SI hafi sýnt fram á að þörf væri á að um 1.100 manns útskrifuðust úr iðnnámi á ári í stað 500-600 manns nú.