Aldrei fleiri aðstoðarbeiðnir

Fjárhagsstaða margra á Suðurnesjum er sögð vera slæm og margir hafa þurft að leita sér aðstoðar nú fyrir jólin að sögn starfsmanna hjálparsamtaka á svæðinu.

Í umfjöllun um mál þetta í Morgunblaðinu í dag segir Anna Valdís Jónsdóttir, stjórnarkona og verkefnastjóri útibús Fjölskylduhjálpar Íslands í Reykjanesbæ, ástandið mjög svart á Suðurnesjum og greinir mikið vonleysi í fólki.

„Það hefur aldrei verið eins mikið um beiðnir um aðstoð og fyrir þessi jól. Það leita fimmtán til tuttugu nýjar fjölskyldur og einstaklingar til okkar dag hvern núna í aðdraganda jóla. Það er hringt alla daga vikunnar og líka um helgar,“ segir Anna. „Þá verða einstaklingar oft mjög illa úti enda styrkja flestar hjálparstofnanir aðeins fjölskyldufólk.“