Vildu breyta dagskrá þingsins

Þingmenn stjórnarandstöðunnar kölluðu eftir því á Alþingi í dag að tvö stjórnarfrumvörp yrðu færð framar á dagskrá þingsins í dag þannig að afgreiða mætti þau áður en önnur umræða um fjáraukalög héldi áfram en umræðan stóð fram á kvöld í gær. Frumvörpin varða frestun nauðungarsala og fjárhagsaðstoð vegna gjaldþrotaskipta. Bentu þeir á að skipt gæti marga máli að frumvörpin yrðu afgreidd sem fyrst.

Einnig vildu stjórnarandstæðingar að frumvarp um breytingar á fjáraukalögum frá stjórnarandstöðunni um að þeir sem væru á atvinnuleysisbótum fengju desemberuppbót yrði samþykkt. Einar K. Guðfinnsson, forseti Alþingis, tók til máls og sagði dagskrá þingsins í dag vera ákveðna. Þá bentu stjórnarliðar á að stjórnarfrumvörpin tvö væru á dagskrá þingsins í dag og yrðu tekin fyrir þegar önnur mál hefðu verið afgreidd.

Þá kvörtuðu stjórnarandstæðingar yfir því að stjórnarliðar hefðu lítinn þátt tekið í umræðum á Alþingi í gærkvöldi um fjáraukalögin. Stjórnarliðar bentu hins vegar á að nokkrir úr þeirra röðum hefðu verið viðstaddir umræðuna. Þess utan hefðu sömu þingmenn og kvörtuðu nú yfir fjarveru stjórnarþingmanna ekki látið sjá sig á síðasta kjörtímabili þegar þáverandi stjórnarandstaða hafi kvartað yfir fjarveru þeirra.

Samþykkt var að halda kvöldfund í kvöld á Alþingi og stendur nú yfir framhald annarrar umræðu um fjáraukalög. Auk þeirra eru 23 önnur mál á dagskrá þingsins í dag.

• 3 blogg um fréttina

Bloggað um fréttina

• Páll Vilhjálmsson: Árni Páll dónast á Vigdísi
• Óðinn Þórisson: Vigdís Hauks. og Guðlaugur Þór verða á staðnum
• Haraldur Haraldsson: Vildu breyta dagskrá þingsins/það sem helst hann varst kann varð …