Innlent | mbl | 21.12.2013 | 14:24 | Uppfært 16:17

Beita sér fyrir lækkun gjalda

Sigmundur Davíð Gunnlaugsson formaður Framsóknarflokksins og Bjarni Benediktsson formaður Sjálfstæðisflokksins. mbl.is/Kristinn Ingvarsson

Ríkisstjórnin ætlar að lækka gjöld sem samþykkt hafa verið í tengslum við afgreiðslu fjárlaga 2014 til að stuðla að því að verðlagsáhrif, sem af þeim leiði, verði minni en ella og innan verðbólgumarkmiða Seðlabanka Íslands.

Þetta kemur fram í yfirlýsingu sem ríkisstjórnin sendi í dag Samtökum atvinnulífsins og Alþýðusambandi Íslands, en í því koma fram þær ráðstafanir sem hún mun beita sér fyrir í tengslum við niðurstöðu kjaraviðræðna á almennum vinnumarkaði.

Frumvarp um breytingar á tekjuskattslögum var lagt fram á Alþingi í dag og var mælt strax fyrir því. Umræður um frumvarpið standa nú yfir á Alþingi.

Inntak bréfs ríkisstjórnarinnar er svohljóðandi:

Með þeirri stefnumörkun sem birtist í fjárlögum 2014 er lögð áhersla á að skapa forsendur fyrir stöðugleika í verðlagsmálum og að auka kaupmátt ráðstöfunartekna. Mikilvægur áfangi í því er að samþykkt séu hallalaus fjárlög og að skilyrði skapist til að lækka skuldir ríkissjóðs í markvissum áföngum á komandi árum.

Ríkisstjórnin hefur fylgst með umleitunum um gerð kjarasamninga sem staðið hafa yfir undanfarnar vikur og mánuði. Í því efni hafa forsætisráðherra og fjármála- og efnahagsráðherra meðal annars gefið út minnisblað þann 15. nóvember sl. þar sem ítrekað er að kjarasamningar með áherslu á kaupmátt fremur en nafnlaunabreytingar séu best til þess fallnir að stuðla að efnahagslegum stöðugleika. Ríkisstjórnin telur mjög jákvætt að aðilar vinnumarkaðarins skuli standa saman að stefnumörkun í kjaramálum sem miðar að stöðugu verðlagi.

Forsenda fyrir frekari aðkomu ríkisstjórnarinnar að gerð kjarasamninga, en þegar er orðin, er að samningsaðilar næðu saman um kaup og kjör. Aðilar vinnumarkaðarins hafa nú tjáð ríkisstjórninni að umgjörð um samninga á almennum vinnumarkaði og efnisatriði nýrra kjarasamninga liggi í meginatriðum fyrir. Til að greiða fyrir gerð þeirra er ríkisstjórnin reiðubúin að veita skuldbindandi fyrirheit um eftirtaldar ráðstafanir:

Í frumvarpi til fjárlaga fyrir árið 2014 er boðað að miðþrep í tekjuskatti einstaklinga lækki úr 25,8% í 25% og hefur sú breyting verið lögfest. Jafnframt hefur ríkisstjórnin lýst því yfir að hún hyggist beita sér fyrir heildarendurskoðun á tekjuskattskerfinu í áföngum með einföldun, fækkun skattþrepa og lækkun jaðarskatta að markmiði. Í ljósi stöðu kjaraviðræðna verður lagt fram frumvarp þar sem efri mörk lægsta þreps tekjuskatts hækka í 290 þúsund krónur og skatthlufall í miðþrepi verður 25,3%. Í þessu felst að skattalækkanir þessar muni koma hinum tekjulægri til góða, jafnframt því sem þær eru liður í að einfalda og auka skilvirkni skattkerfisins. Er stefnt að því að tekin verði frekari skref í þá átt við framlagningu frumvarps til fjárlaga 2015.

Næstu tvö ár verði gjaldskrárhækkanir ríkisins undir verðbólgumarkmiði Seðlabanka Íslands, miðað við þær forsendur sem samningarnir byggja á. Náist kjarasamningar til lengri tíma með stöðugleika að leiðarljósi yrði stefnt að því að gjaldskrárhækkanir ríkisins verði innan þeirra marka út samningstímann. Þannig leggur ríkisstjórnin sitt af mörkum til að tryggja verðlagsstöðugleika með öðrum opinberum aðilum. Afar brýnt er að fyrirtæki á markaði axli ábyrgð á þróun verðlags og er gengið út frá að svo verði.

Ríkisstjórnin lýsir því yfir að hún muni við samþykkt kjarasamninga endurskoða til lækkunar vissar breytingar á gjöldum sem samþykktar hafa verið í tengslum við afgreiðslu fjárlaga 2014 til að stuðla að því að verðlagsáhrif, sem af þeim leiði, verði minni en ella og innan verðbólgumarkmiða Seðlabanka Íslands.

Ríkisstjórnin mun beita sér fyrir því að fyrirtæki í ríkiseigu, þ.m.t. orkufyrirtæki, gæti ítrasta aðhalds við gjaldskrárbreytingar á komandi ári.

Ríkisstjórnin hyggst áfram vinna að umbótum í menntamálum þeirra sem litla menntun hafa í góðu samstarfi við aðila vinnumarkaðarins.

Í samræmi við yfirlýsingu ríkisstjórnarinnar frá 15. nóvember sl. um undirbúning kjarasamninga verður komið á fastanefnd um samskipti hins opinbera og aðila vinnumarkaðarins og mun það samstarf m.a. miða að virku aðhaldi í verðlagsmálum. Endurskoðun á virðisaukaskattskerfinu, sem senn hefst, verður unnin í samráði við samtök atvinnuveitenda og launþega.