Ráðherra veðurtepptur á Flateyri

„Veðurtepptur á Flateyri. Stormur á storm ofan, allt ófært,“ segir Illugi Gunnarsson, menntamálaráðherra, á Facebook-síðu sinni í dag en hann hefur verið á Flateyri að undanförnu þar sem eiginkona hans, Brynhildur Einarsdóttir, á rætur sínar.

Slæm færð er víða á Vestfjörðum samkvæmt upplýsingum frá Vegagerðinni. Þannig er þæfingsfærð og skafrenningur á Flateyrarvegi og fólk beðið um að gæta varúðar þar vegna snjóflóðahættu. Þá er ófært og óveður á Steingrímsfjarðarheiði og um Þröskulda. Hætt var við að moka heiðina og Ísafjarðardjúp í dag en skoðað verður með mokstur í fyrramálið.

Illugi segir hins vegar gott að vita af snjóflóðavörninni fyrir ofan Sólbakka þar sem fjölskyldan hefur aðsetur. Þau slappi af og bíði þess að veðrinu sloti.

• 2 blogg um fréttina

Bloggað um fréttina

• Ómar Ragnarsson: Gott að ráðherrar kynnist endemis samgöngum.
• Magni Örvar Guðmundsson: Ráðherra veðurtepptur á Flateyri