Ekki fengið svör um danska rannsókn

„Hvorki ráðuneytinu né íslenskum skattyfirvöldum er kunnugt um niðurstöður boðaðrar rannsóknar ráðherra skattamála í Danmörku á uppruna fjármagns sem Íslendingar notuðu til kaupa á stórfyrirtækjum í Danmörku eða hvort slík rannsókn hafi farið fram.“

Þetta kemur fram í svari Bjarna Benediktssonar, fjármála- og efnahagsráðherra, við skriflegri fyrirspurn frá Birgittu Jónsdóttur, þingmanns Pírata. Spurningin er á þá leið hvort íslenskum eftirlitsaðilum sé kunnugt um niðurstöður rannsóknar ráðherra skattamála í Danmörku, sem boðuð hafi verið í nóvember 2006, á uppruna fjármagns sem Íslendingar hafi notað til kaupa á stórfyrirtækjum í Danmörku.

„Hins vegar er vitað að dönsk skattyfirvöld fóru í sérstakt átak til að kanna fjármagnsflutninga frá Danmörku til lágskattaríkja en ekkert hefur komið fram opinberlega eftir því sem næst verður komist um það hvort færslur íslenskra aðila hafi verið sérstaklega skoðaðar eða hverjar niðurstöður hafi verið hafi slík skoðun farið fram. Ráðuneytið hefur sent fyrirspurn til danska skattamálaráðuneytisins varðandi stöðu þessa máls en svör við henni hafa enn ekki borist,“ segir ennfremur í svari ráðherrans.

Birgitta Jónsdóttir, þingmaður Pírata. mbl.is/Ómar Óskarsson

• 1 blogg um fréttina

Bloggað um fréttina

• Ómar Bjarki Kristjánsson: Danmörk 2006: Skatteminister vil undersøge islændinge. Islandske investeringer i Danmark …