Innlent | mbl | 3.2.2014 | 14:37

Vonbrigði með snautlegt tilboð

Frá brautskráningu stúdenta. mbl.is/Kristinn

Kennarar við Menntaskólann við Hamrahlíð lýsa vonbrigðum yfir „snautlegu tilboði“ samninganefndar ríkisins til hækkunar launa framhaldsskólakennara, þar sem gert er ráð fyrir launahækkun upp á 2,8% í samningi til 12 mánaða. Í sama streng taka kennarar og stjórnendur í Menntaskólanum á Tröllaskaga sem krefjast raunverulegra kjarabóta.

Fundur var haldinn í Kennarafélagi skólans í morgun og í framhaldi sendi félagið frá sér ályktun.

Þar segir að fundurinn bendi á að laun framhaldsskólakennara hafa dregist langt aftur úr stéttum með sambærilega menntun og ábyrgð í starfi. Munurinn nemur nú 17% en sífellt eru gerðar meiri og flóknari kröfur til framhaldsskólakennara í daglegu starfi. Auk þess sýnir skýrsla allra aðila á vinnumarkaði frá október 2013 svart á hvítu að laun framhaldsskólakennara hafa hækkað minna en hjá öllum öðrum á árunum 2006 til 2013. „Slök starfskjör ógna nýliðun og grafa undan gæðum skólastarfs,“ segir í ályktuninni.

Miskunnarlaus niðurskurður og aukið álag

„Miskunnarlaus niðurskurður til framhaldsskólans undanfarinn áratug hefur stóraukið vinnuálag kennara og hamlar eðlilegri og brýnni þróun skólastigsins. Við það verður ekki unað lengur. Það er stjórnvöldum á Íslandi til skammar að félagsfólk KÍ í framhaldsskólum neyðist nú enn einu sinni til að fara í harða kjarabaráttu til þess að draga framhaldsskólann upp úr feni lágra launa og óviðunandi aðstöðu.“

Fundurinn skorar á fjármálaráðherra og mennta- og menningarmálaráðherra að leita allra leiða til að leiðrétta launakjör framhaldsskólakennara, bæta starfsumhverfi stéttarinnar og koma með því í veg fyrir verkfall. Þannig verður stuðlað að því að tryggja gæði menntunar á Íslandi til framtíðar.

Krefjast raunverulegra kjarabóta

Í sama streng taka kennarar og stjórnendur í Menntaskólanum á Tröllaskaga. Þeir krefjast þess að nýir kjarasamningar framhaldsskólakennara við ríkið feli í sér raunverulegar kjarabætur.

„Að lágmarki ætti nýr samningur að fela í sér að bætt verði kjararýrnun sem framhaldsskólakennarar hafa orðið fyrir umfram viðmiðunarstéttir. Munurinn mælist 17% á dagvinnulaunum og 10% á heildarlaunum á tímabilinu 2006 til 2013. Þar að auki er þörf á að bæta starfsaðstæður og kjör ef mögulegt á að vera að auka gæði menntunar,“ segir í ályktun sem kennarar og stjórnendur MT sendu frá sér eftir samstöðufund í morgun.

„Slæm starfskjör ógna nýliðun í stéttinni. Margir munu hætta vegna aldurs á næstu árum en aðsókn í kennaranám hefur hins vegar minnkað og er ekki að efa að slök launakjör og lenging námsins eru aðalástæður þess,“ segir í ályktuninni.