Sem póststöð flöskuskeyta á Langanesi

Flöskuskeyti frá Færeyjum virðast eiga vísa póststöð á austanverðu Langanesi en sjómannadagspóstur frá Klakksvík í Færeyjum hefur kúrt þar í fjörunni eftir mislangan tíma í hafi ásamt fleiri skeytum.

Göngugarpurinn Guðjón Gamalíelsson á Þórshöfn röltir oft um eyðistrendur Langaness og ýmislegt rekur á fjörur hans á leiðinni, þar með flöskuskeyti, að því er fram kemur í umfjöllun um póstkomur þessar í Morgunblaðinu í dag.

Seint í janúar fann Guðjón fjögur flöskuskeyti á göngu sinni, öll á svæðinu á milli eyðibýlanna Hrollaugsstaða og Selvíkur og voru tvö frá Íslendingum, eitt frá Noregi og eitt frá Klakksvík.