Dýrustu íbúðirnar á 300 milljónir króna

„Miðborgin hefur líklega sjaldan notið meiri vinsælda en nú. Eignir þar eru hátt verðlagðar en seljast fljótt,“ segir Sverrir Kristinsson, framkvæmdastjóri Eignamiðlunar.

Eins og fram hefur komið hefjast á næstunni framkvæmdir við byggingu háhýsa í Skuggahverfi í Reykjavík. Þetta eru tveir turnar, 11 og 18 hæða, og er þetta síðasti áfanginn í uppbyggingu hverfisins, það er byggðinni sem liggur niður að Skúlagötu og Sæbraut

Í ellefu hæða turninum eru 35 íbúðir en 41 íbúð í þeim sem er átján hæðir. Flestar íbúðirnar eru 80-100 fm að stærð og verð á fermetra verður 450 til 600 þúsund kr. Í þeim glæsilegustu þar sem útsýnið er mest nálgast verð per. fermetra um eina milljón kr. „Þær eignir gætu kostað 200 til 300 milljónir kr.,“ segir Sverrir.