Innlent | mbl | 18.3.2014 | 17:45

Verðmæti náttúru skert með raski

Verðmætin í náttúrunni sem aðdráttarafli fyrir ferðamennsku skerðast með hverri framkvæmd sem farið er út í í náttúru landsins. Þetta segir leikstjórinn Darren Aronofsky. Björk segir að þær framkvæmdir sem farið hafi verið út í hafi ekki skilað því sem búið var að lofa, þau ræddu við mbl.is í dag en í kvöld fara fram tónleikarnir Stopp Gætum garðsins! þar sem listamenn á borð við Björk, Patti Smith og Lykke Li koma fram til að vekja athygli á náttúruvernd og hvetja stjórnvöld til þess að ný lög um náttúruvernd taki gildi hinn 1. apríl.

Patti Smith og Björk sátu blaðamannafund í Hörpu í dag ásamt Aronofsky en mynd hans Noah, sem tekin var að miklu leyti hér á landi, verður sýnd í Sambíóunum í Egilshöll í dag.

Björk segir jafnframt að það sé ólíklegt að æska landsins eigi sér þann draum að starfa í áburðarverksmiðju í framtíðinni. Hún sé hlynnt tækninýjungum og framförum en með þeim formerkjum að unnið sé í sátt við náttúruna, lausnir í atvinnumálum eigi að vera grænar.

Uppselt er á tónleikana og í dag var tilkynnt að Náttúruverndarsjóður Pálma Jónssonar, stofnanda Hagkaupa, myndi styrkja söfnunina um 24 milljónir króna og með því framlagi náist að safna um 35 milljónum króna alls.

Í yfirlýsingu frá aðstandendum tónleikanna er athygli vakin á að hvergi annars staðar sé að „finna Mývatn, Þjórsárver, Sprengisand, Skaftafell og Langasjó“. Því sé t.a.m. mikilvægt að falla frá hugmyndum um virkjanir í Bjarnarflagi og Þjórsárverum. Þá er þess krafist að „einstök náttúra Reykjaness verði vernduð með stofnun eldfjallaþjóðgarðs og að allar nýjar raflínur verði lagðar í jörð“.

Tilkynning frá stjórnendum sjóðsins:

„Draumur um heildstæðan þjóðgarð á miðhálendinu hefur lifað með sjóðnum frá stofnun hans. Íslenska hálendið er einstakt á heimsvísu í ljósi fegurðar, jarðmyndana, lífríkis og síðast en ekki síst ósnortins víðernis. Okkur sem eigum þetta fjöregg ber skylda til að standa vörð um verndun þess og skila því óspjölluðu í hendur næstu kynslóða.

Núna eru yfirvofandi miklar ógnir við hálendið af mannavöldum og því hefur þetta verkefni aldrei verið brýnna.

Allir þeir sem unna íslenskri náttúru og ekki síst náttúrverndarhreyfingar landsins eiga að sameinast um þetta verkefni. Nú er tækifæri til að stuðla á kraftmikinn hátt að því að miðhálendi Íslands verði skilgreint og verndað sem sú heild sem það nú er.

Náttúruverndarsjóður Pálma Jónssonar vill leggja sitt lóð á vogarskálarnar til að þetta takist og þar með gæta garðsins stóra, með því að styrkja Landvernd og Náttúruverndarsamtök Íslands með myndarlegri upphæð.“

Lilja Pálmadóttir, formaður stjórnar,

Guðmundur Oddur Magnússon stjórnarmaður,

Skúli Skúlason stjórnarmaður.

Yfirlýsing Stopp - Gætum garðsins!

Um heim allan hefur náttúru og umhverfi verið fórnað á altari þróunar sem aldrei getur talist sjálfbær. Regnskógum er eytt, vatnsföll stífluð, landi eytt, vatn og höf menguð, loftslagi jarðar breytt og höfin súrna ört.

Á Íslandi hefur Kárahnjúkavirkjun orðið táknmynd þeirrar eyðileggingar sem ógnar tilvist mannsins á jörðinni. Það er skylda okkar að vernda íslenska náttúru og skila henni heilli til framtíðarkynslóða.

Hálendi Íslands, stærsta víðerni í Evrópu þar sem ósnortin og lítt snortin náttúra fá enn notið sín, er ekki bara athvarf og fjársjóður okkar sem erfðum og munu erfa þetta land heldur heimsins alls. Hvergi annars staðar er að finna Mývatn, Þjórsárver, Sprengisand, Skaftafell og Langasjó.

Við krefjumst þess að Þjórsárver, víðernin vestan Þjórsár og fossarnir í Þjórsá verði verndaðir til allrar framtíðar. Við mótmælum harðlega áformum umhverfis- og auðlindaráðherra um breytt friðlandsmörk í Þjórsárverum til að skapa rými fyrir Norðlingaölduveitu eða annað miðlunarlón við Þjórsárver. Sú lagatúlkun ráðherra að allir virkjunarkostir eða náttúrusvæði séu undir í hverjum nýjum áfanga rammaáætlunar er aðför náttúru landsins og stenst vart lög.

Við höfum einstakt tækifæri núna til að gera hálendið allt að einum þjóðgarði með lögum frá Alþingi. Þar með verði hálendi Íslands sett undir eina skipulagsstjórn og skýrt afmarkað. Þar með heyri öll áform um lagningu raflína, vegagerð eða önnur mannvirki sem kljúfa eða sundra dýrmætum landslagsheildum hálendisins sögunni til.

Við vörum eindregið við hvers kyns áformum um virkjun jarðvarma við Mývatn. Bygging Bjarnarflagsvirkjunar er ekki áhættunnar virði. Hvergi í heiminum er annað Mývatn til. Ábyrgð okkar er því mikil.

Við krefjumst þess að einstök náttúra Reykjaness verði vernduð með stofnun eldfjallaþjóðgarðs og að allar nýjar raflínur verði lagðar í jörð.

Við teljum afar brýnt að ríkisvaldið tryggi landvörslu og verji dýrmæt náttúrusvæði gegn sívaxandi ágangi ferðamanna.

Við mótmælum sérstaklega aðför yfirvalda að náttúruverndarfólki, þar sem fordæmalaus yfirgangur lögreglu og ákærur gagnvart þeim sem vilja vernda Gálgahraun var grimmur og óþarfur. Við minnum á að réttur almennings til að mótmæla náttúruspjöllum hvarvetna um heim allan er heilagur og grunnforsenda þess að mannkyni takist að forða tortímingu mannlífs á jörðinni.

Við krefjumst þess að frumvarp til laga um brottfall nýrra náttúruverndarlaga verði dregið til baka og að ný lög um náttúruvernd taki gildi 1. apríl eins og lögin kveða á um.