Gott að fá Stoltenberg til NATO

Jens Stoltenberg, fyrrverandi forsætisráðherra Noregs, verður næsti framkvæmdastjóri Atlantshafsbandalagsins, en fastaráð bandalagsins komst samhljóða að þeirri niðurstöðu á fundi sínum í dag.

Stoltenberg mun taka við af Anders Fogh Rasmussen hinn 1. október nk. Jens Stoltenberg er þrettándi framkvæmdastjóri bandalagsins frá stofnun þess og fyrsti Norðmaðurinn til að gegna stöðunni.

„Jens Stoltenberg er vel að tilnefningunni kominn,“ er haft eftir Sigmundi Davíð Gunnlaugssyni forsætisráðherra í fréttatilkynningu en hann upplýsti ríkisstjórnina um fyrirhugaða ákvörðun fastaráðsins í morgun.

„Hann hefur mikla reynslu af alþjóðamálum og hefur vakið verðskuldaða athygli á alþjóðavettvangi á umliðnum árum. Atlantshafsbandalagið er ein af meginstoðum varnarsamstarfs Íslands og það er okkur Íslendingum mikið hagsmunamál hver heldur þar um stjórnartaumana hverju sinni. Anders Fogh Rasmussen hefur reynst farsæll framkvæmdastjóri og ég hef fulla trú á að Jens Stoltenberg, annar norrænn leiðtogi, muni verða það einnig.“

Gunnar Bragi Sveinsson utanríkisráðherra segir að fyrir íslenska hagsmuni sé gott að nýr framkvæmdastjóri Atlantshafsbandalagsins þekki vel til áherslna Íslands í málefnum bandalagsins. „Norsk stjórnvöld hafa reynst áreiðanlegur og góður samstarfsaðili í öryggis- og varnarmálum á síðustu árum. Norðmenn hafa tekið reglulega þátt í loftrýmisgæslu á Íslandi frá árinu 2009 og leiddu nú síðast þátttöku Svía og Finna í loftvarnaræfingum á Íslandi í síðasta mánuði. Við studdum því heilshugar að Jens Stoltenberg yrði fyrir valinu sem næsti framkvæmdastjóri,“ er haft eftir Gunnari Braga í fréttatilkynningu.

Jens Stoltenberg. AFP

• 1 blogg um fréttina

Bloggað um fréttina

• Páll Vilhjálmsson: Nató-sameining VG og Samfó