María Lilja dæmd fyrir meiðyrði

Héraðsdómur Reykjavíkur hefur dæmt tiltekin ummæli sem viðhöfð voru í Fréttablaðinu og á fréttavefnum Vísi dauð og ómerk. Ummælin voru í umfjöllun um samtökin Vörn fyrir börn og forstöðukonu þeirra, Kristínu Snæfells. Þá var blaðamanni gert að greiða Kristínu 200 þúsund krónur í miskabætur og 300 þúsund krónur í málskostnað.

Kristín höfðaði mál á hendur Maríu Lilju Þrastardóttur vegna skrifa hennar í Fréttablaðið í júní í fyrra, annars vegar undir fyrirsögninni Varað við fúskurum í barnavernd og hins vegar Barn látið ljúga til um kynferðisofbeldi.

Hún krafðist þess að tiltekin ummæli verði dæmd dauð og ómerk, María Lilja greiði henni tvær milljónir í miskabætur, tvö hundruð þúsund til að birta forsendur dómsins í einu dagblaði og málskostnað.

Ummælin sem dæmd voru dauð og ómerk voru:

1. Varað við fúskurum í barnavernd.
2. Auk barnaverndaryfirvalda hefur embætti ríkissaksóknara einnig varað við starfsemi þjónustumiðstöðvarinnar Vörn fyrir börn vegna tilfella þar sem forsvarsfólk þjónustumiðstöðvarinnar hafi gert tilraunir til þess að fá gögn í máli ólögráða einstaklinga á fölskum forsendum og án samþykkis forsjáraðila.
3. Kristín Snæfells, stofnandi og forstöðukona samtakanna Vörn fyrir börn, sem nýverið opnaði þjónustumiðstöð fyrir börn sem orðið hafa fyrir kynferðisofbeldi, tók þátt í því að láta ungt barn ljúga grófu kynferðisofbeldi upp á föður sinn í forræðisdeilu.
4. Í síðasta viðtali við Barnahús greindi barnið svo frá þeim þrýstingi sem það sætti af hendi móður sinnar og Kristínar til að segja ósatt um föður sinn.

 Frétt mbl.is: Barnaverndarsamtök rúin trausti

Kristín Snæfells

• Blogga um frétt