Innlent | mbl | 7.4.2014 | 14:41 | Uppfært 15:24

Afstaðan ræðst ekki af umvöndunum

Sigmundur Davíð Gunnlaugsson, forsætisráðherra. mbl.is/Árni Sæberg

Sigmundur Davíð Gunnlaugsson forsætisráðherra segir að Íslendingar muni meta hvort rétt sé að veiða hval út frá hagsmunum landsins. Þar verði tekið mið af sjálfbærni, efnahagslegum forsendum og áhrifum á aðrar atvinnugreinar.

Hins vegar muni afstaðan ekki ráðast af umvöndunum þeirra sem telja að aðrar reglur eigi að gilda um okkur en þá sjálfa.

Í pistli á vefsíðu sinni segir hann að það hafi komið á daginn að sumum fannst ekki við hæfi að kalla Bandaríkjamenn mestu hvalveiðiþjóð heims. „Þeim finnst ekki við hæfi að telja með hvali sem veiddir eru af frumbyggjum. Þau 2.760 tonn sem Bandaríkjamenn veiddu árið 2012 teljast þannig léttvægari en 260 tonn Íslendinga, enda Íslendingar einhverra hluta vegna ekki taldir frumbyggjar. Þetta eru þó bara hinar „formlegu veiðar“.

Jafnframt er litið framhjá þeim hvalveiðum þar sem hræjunum er hent fremur en að verka þau og nýta,“ segir Sigmundur.

Hann bendir jafnframt á að á seinni hluta tuttugustu aldar hafi sex til sjö milljónir höfrunga verið drepnar í vestanverðu Kyrrahafi. Til samanburðar hafi atvinnuhvalveiðar allra þjóða alla tuttugustu öldina numið um tveimur milljónum dýra.

Margfalt fleiri höfrungar drepnir en hvalir

„Eins og nærri má geta hrundi höfrungastofninn í Kyrrahafi og nú hefur dregið mjög úr slíkum veiðum. Sé litið til fjölda dýra eru þó árlega margfalt fleiri höfrungar drepnir á þennan hátt en nemur hvalveiðum Norðmanna, svo ekki sé minnst á Íslendinga,“ segir forsætisráðherra.

Þá hafi náttúruverndarsamtök í Bandaríkjunum undanfarin ár safnað undirskriftum gegn því að þarlend yfirvöld veiti bandaríska hernum „kvóta“ til að sprengja höfrunga og önnur dýr af ættbálki hvala.

„Á þessu ári mun sjóherinn hefja nýjar tilraunir með neðansjávarsprengjur og önnur hergögn. Tilraunirnar munu standa til 2019. Bandaríski sjóherinn áætlar að 341 hvalur drepist, 13.306 særist alvarlega, 3,75 milljónir hljóti minniháttar tjón á borð við tímabundið heyrnarleysi og í 27,7 milljónum tilvika geti tilraunirnar truflað atferli dýranna,“ segir Sigmundur Davíð.