Innlent | mbl | 7.4.2014 | 17:56 | Uppfært 20:56

Norræna vill sigla til Eskifjarðar

Norræna við bryggju á Seyðisfirði. mbl.is/Sigurður Bogi

Útgerð Norrænu P/F Smyril Line hefur óskað eftir viðræðum um hafnaraðstöðu fyrir ferjuna í Fjarðabyggð. Forsvarsmenn Fjarðabyggðar taka fram að þeir hafi á engum tímapunkti nálgast stjórn útgerðarinnar um flutning Norrænu frá Seyðisfirði. Tekið er fram að enn sé óljóst hver verði endanleg niðurstaða viðræðnanna.

Þetta kemur fram á heimasíðu Fjarðabyggðar.

Ellefu íbúar á Seyðisfirði hafa sent ráðherrum ríkisstjórnarinnar og þingmönnum opið bréf þar sem flutningi á Norrænu frá Seyðisfirði til Eskifjarðar er mótmælt. Þá eru stjórnvöld hvött til inngrips.

„Samningaviðræður eru nú í gangi á milli Fjarðabyggðahafna og Smyril Line um að flytja viðkomuhöfn ferjunnar Norrænu frá Seyðisfirði til Eskifjarðar sem kemur til með að hafa gríðarlega neikvæð áhrif á alla starfsemi fyrirtækja hér á staðnum og á rekstur sveitarfélagsins í heild sinni,“ segir í bréfinu.

Beiðnin barst í október

Á vef Fjarðabyggðar segir, að beiðni Smyril Line hafi borist Fjarðabyggðarhöfnum þann 30. október sl. og var bæjarfulltrúum á Seyðisfirði þegar tilkynnt um efni hennar, svo að þeir gætu brugðist strax við og leitað mögulegra lausna. Þá segir, að einnig hafi bæjarfulltrúum á Seyðisfirði verið gerð grein fyrir, að erindið fengi sömu formlegu afgreiðslu og önnur sem berist sveitarfélaginu frá atvinnu- og viðskiptalífi.

„Að íhuguðu máli mat hafnarstjórn Fjarðabyggðar það svo, að henni væri skylt að verða við beiðni P/F Smyril Line um viðræður og brýnt væri að fá fyrirætlanir útgerðarinnar upp á borðið, svo taka mætti upplýsta og málefnalega afstöðu til málsins,“ segir í tilkynningu Fjarðabyggðar.

Útgerðin óskar eftir aðstöðun á Eskifirði

Þar segir ennfremur, að sú ákvörðun útgerðarinnar að horfa annað með starfsemi sína setji sameiginlegar samþykktir á vettvangi Sambands sveitarfélaga á Austurlandi í ákveðið uppnám sem Fjarðabyggð líkt og önnur sveitarfélög hafi ekki getað séð fyrir.

„Viðræður við P/F Smyril Line hafa leitt í ljós, að útgerðin óskar fyrst og fremst eftir aðstöðu á Eskifirði. Um þá afstöðu fjallaði hafnarstjórn og bæjarráð Fjarðabyggðar á sameiginlegum fundi 25. mars sl. Ákveðið var að halda áfram viðræðum á þeim grunni og var fulltrúum bæjarstjórnar Seyðisfjarðar gert grein fyrir því í samræmi við góða starfshætti og gegnsæja.

Ekki er enn ljóst hver endanleg niðurstaða viðræðnanna verður,“ segir á vef Fjarðabyggðar.