Tíu gamlir símaklefar boðnir til sölu

Tíu símaklefar í misjöfnu ástandi eru falir. Klefarnir verða til sýnis í birgðastöð Símans á Jörfa, neðan við Póstmiðstöðina, í dag og á miðvikudaginn kemur.

„Þetta eru símaklefar sem búið er að taka niður,“ sagði Magnús Nordgulen, starfsmaður Símans. Hann sagði klefana ekki vera mjög gamla. Þeir eru smíðaðir úr álprófílum og gleri. Magnús kvaðst ekki vita hvort símar fylgdu klefunum.

Síðustu símaklefarnir voru flestir fjarlægðir á liðnu ári. Í haust sem leið voru 14 símaklefar og um 30 símasjálfsalar, oft kallaðir tíkallasímar, enn í notkun en þeir voru lítið notaðir. Til samanburðar má nefna að á árinu 2004 voru 485 tíkallasímar í notkun hér á landi.