Ný byggð kallar á mat á afköstum

Meta þarf afkastagetu dreifikerfis Orkuveitunnar upp á nýtt ef af áformum um uppbyggingu verður í Reykjavík vestan Öskjuhlíðar.

Að sögn Eiríks Hjálmarssonar, upplýsingafulltrúa Orkuveitunnar, lítur fyrirtækið svo á að tankarnir í Öskjuhlíð gætu orðið of litlir ef af uppbyggingaráformum yrði. „Kosturinn við þéttingu byggðar er sá að þannig nýtist veitukerfið betur. En það getur líka kallað á framkvæmdir með tilliti til afkastagetu,“ segir Eiríkur í Morgunblaðinu í dag.

Hann segir að ekki sé hafin vinna innan Orkuveitunnar til að takast á við fyrirhuguð byggingaráform.