Mikil þörf fyrir greiningu

Alls hafa 580 tilvísanir fullorðinna einstaklinga borist ADHD-teymi Landspítalans á því rúma ári sem það hefur starfað. Þar af hafa 150 fengið afgreiðslu. Teymið fékk allt að 70 tilvísanir á mánuði í byrjun.

Fólkið er á öllum aldri, sumir eru rosknir, og margir hafa aðrar raskanir, eins og t.d. þunglyndi, hvatvísi og kvíða. Brynjar Emilsson, einn sálfræðinganna í teyminu, segir að hingað til hafi lítið eftirlit verið með ADHD-greiningum hér á landi.

„Það dugar ekki að einhver einn úti í bæ sé að greina þetta. Hingað til hefur allur gangur verið á því hvernig þessar greiningar eru gerðar, ekki bara hér á landi. ADHD er röskun á taugaþroska og það þarf að gera þetta almennilega af fagfólki sem hefur sérþekkingu á ADHD,“ segir hann í umfjöllun um mál þetta í Morgunblaðinu í dag.