Sjá merki um eldgos á Reykjaneshryggnum

„Við sjáum breytingar sem eru vísbending um að það hafi orðið gos samfara skjálftahrinu sem var þarna úti á 61. gráðu,“ segir Ármann Höskuldsson eldfjallafræðingur og vísar í máli sínu til mælinga á jarðskjálftavirkni á Reykjaneshrygg.

Ármann hefur að undanförnu farið yfir og borið saman gagnasafn um landslagið á hafsbotni svæðisins frá árinu 1994 og mælingum sem safnað var í fyrra haust. „Það var jarðskjálftahrina á þessu tímabili, einmitt á því svæði þar sem við sjáum breytingar í landslagi.“

Í frétt um þetta efni í Morgunblaðinu í dag segir Ármann niðurstöðuna nokkuð merkilega í ljósi þess að ekki er vitað um mörg eldgos á þessu svæði.