Borgin lét loka goshvernum Stróki

Strókur, manngerði goshverinn í Öskjuhlíð, er lokaður og ekki hefur verið hirt um svæðið. Goshverinn og svæðið í kring er í eigu Reykjavíkurborgar. Strókur hefur í gegnum árin verið vinsæll áfangastaður ferðamanna í Reykjavík.

Í umfjöllun um mál þetta í Morgunblaðinu í dag segir Hrólfur Jónsson, skrifstofustjóri hjá skrifstofu eigna- og atvinnuþróunar Reykjavíkurborgar, að við kaupin á Perlunni hafi verið ákveðið að loka Stróki. „Goshverinn krefst stöðugrar vöktunar og okkur finnst sá rekstrarkostnaður of mikill.“

Kjartani Magnússyni, borgarfulltrúa Sjálfstæðisflokksins, finnst slæmt að Stróki sé ekki haldið við. „Perlan er einn fjölsóttasti ferðamannastaður borgarinnar og landsins. Strókur hefur skipt máli í því sambandi og er því slæmt að honum sé ekki haldið við, sérstaklega að komin sé órækt í kringum hverinn.“