Þúsundir lítra af mjólk helltust niður

Ótrúleg heppni var að enginn slasaðist þegar mjólkurbíll fór á hliðina í Flókadal í Borgarfirði í dag. Um 20.000 lítrar af mjólk voru í bílnum og flæddi rúmur helmingurinn út. Bílstjórinn segir mörg hundruð kílómetra kafla vegakerfisins vera hættulega fyrir stóra flutningabíla.

Lítil sem engin öxl er á veginum um Steðjabrekku, þar sem slysið varð, og að sögn Finns Péturssonar bónda og bílstjóra mjólkurbílsins brotnaði úr kantinum undan þunga tengivagnsins sem hékk aftan í bílnum. 

„Það var nú eiginlega bara mildi að enginn slasaðist, því bíllinn kastaðist yfir á rangan vegarhelming þegar slinkurinn kom á hann og það var töluverð umferð á veginum þegar þetta gerðist. Það var alveg ótrúleg heppni.“

Aðrar kröfur um veghönnun í dag

Sjálfur slapp hann með skrekkinn en þetta endaði þannig að bíllinn fór á út af veginum og á hliðina. Lokið var við að sækja mjólkina og var Finnur á leið í Mjólkursamsöluna á Selfossi þegar slysið varð. Ríflega 10 þúsund lítrar af mjólk flæddu úr bílnum, en tæplega helmingnum var bjargað með því að dæla honum yfir á annan mjólkurbíl.

„Þetta er bara eins og sagt var í sveitinni í gamla daga, að þetta er eins og hvert annað hundsbit þegar svona gerist og engum að kenna,“ segir Finnur. Nú eftir kvöldmat fóru tveir stórir kranabílar á staðinn, réttu flutningabílinn við og hífðu hann upp á vagn sem er nú á leið suður. Mjólkinni sem bjargaðist var komið á Selfoss. 

Finnur segir að svona mjóir vegir geti sannarlega verið varasamir flutningabílum. „Það eru aðrar kröfur gerðar um hönnun í dag heldur en þegar þetta var gert. Vegagerðin gerir örugglega allt það sem hún getur til að halda hlutunum í lagi miðað við það fjármagn sem þeir hafa, ég ætla þeim ekki annað, en það eru mörg hundruð kílómetrar af vegakerfinu sem eru hættulegir fyrir svona stóra bíla.“

• 1 blogg um fréttina

Bloggað um fréttina

• Örn Ingólfsson: Vegagerðin og ríkishýtin!