Innlent | mbl | 1.7.2014 | 16:01 | Uppfært 16:49

Flutningurinn „pólitísk geðþóttaákvörðun“

Þungt hljóð var í starfsmönnum Fiskistofu sem funduðu með fulltrúum stéttarfélaga nú síðdegis. Ljósmynd/SFR

Starfsmenn Fiskistofu fjölmenntu á fund nú síðdegis með fulltrúum stéttarfélaga og þungt hljóð í fólki. Ástæður baki ákvörðuninni voru mikið ræddar, og virðist sem sjávarútvegsráðherra hafi gefið þær skýringar til starfsfólks að hátt húsnæðisverð á höfuðborgarsvæðinu væri ein helsta ástæða flutninganna.

Þetta kemur fram á vef SFR. Þar segir að meðal umræðuefna hafi einnig verið réttindi fólks til biðlauna, eftirlauna og uppsagnafrests. Þá hafi fólki verið ástæður ákvörðunar stjórnvalda ofarlega í huga og þær aðferðir sem beitt var við ákvarðanatökuna.

Engar rannsóknir eða upplýsingaöflun að baki

„Svo virðist sem ráðherra hafi á fundi með starfsfólki fyrir helgi einna helst gefið upp sem ástæðu fyrir flutningunum hátt verð húsnæðis á höfuðborgarsvæðinu,“ segir á vef SFR.

Þórarinn Eyfjörð framkvæmdastjóri SFR sagðist, eftir fund með fulltrúum atvinnuvegaráðuneytisins í morgun, hafa sannfærst um að engar rannsóknir, upplýsingaöflun né nokkurs konar samvinna um hagsmuni stofnunarinnar hafi legið að baki ákvörðuninni. Hún hafi hreinlega verið „pólitísk geðþóttaákvörðun“ sem enn eigi eftir að finna rök fyrir.

„Starfsmennirnir voru harðorðir og margir sögðust óttast að þetta væri einungis byrjunin, búast mætti við að það sama gæti hent starfsmenn annarra stofnana,“ segir á vef SFR.

Dulbúin hópuppsögn

Í lok fundarins var eftirfarandi ályktun samþykkt:

„Starfsmenn Fiskistofu og stéttarfélög þeirra gagnrýna harðlega ákvörðun um flutning Fiskistofu til Akureyrar. Fyrirhugaður flutningur er í raun lítið annað en dulbúin hópuppsögn fjölda reynslumikilla starfsmanna stofnunarinnar. Flutningurinn mun ekki einungis kippa fótunum undan starfsmönnum og fjölskyldum þeirra heldur mun einnig öll sú reynsla og þekking, sem orðið hefur til hjá stofnuninni frá upphafi, tapast að miklu leyti. Það hafi nú þegar sýnt sig, bæði hér á landi og hjá nágrannaþjóðum okkar, að það tekur mörg ár að byggja slíka þekkingu upp að nýju.

Starfsmenn mótmæla þessum gamaldags og harðneskjulegu aðferðum, þar sem fólki er skákað á milli kjördæma í refskák stjórnmálanna í fálmkenndri viðleitni stjórnvalda til að fjölga störfum á landsbyggðinni. Bent hefur verið á raunhæfari og markvissari leiðir til þess, m.a. með því að staðsetja ný verkefni eða deildir úti á landi svo þær geti vaxið þar frá byrjun. Starfsmenn og stéttarfélög þeirra skora á stjórnvöld að endurskoða þessi áform sín og setja fram heilsteypta framtíðarsýn í þróun opinberrar stjórnsýslu."