Góður gangur í strandveiðum

Strandveiðar hafa gengið betur á flestum svæðum það sem af er sumri en á sama tíma í fyrra. Örn Pálsson, framkvæmdastjóri Landssambands smábátaeigenda, sagði að gæftir hefðu verið prýðilegar í sumar.

„Í fyrra dugði aflinn á B-svæðinu (Strandabyggð – Grýtubakkahreppur) alveg út júní en nú lokaðist það 26. júní. Á B-svæðinu kláruðust því allar aflaheimildir og eins á A-svæðinu (Eyja- og Miklholtshrepur – Súðavíkurhreppur),“ sagði Örn.

Strandveiðisjómenn á A-svæðinu eru fljótastir að ná í mánaðarskammtinn, að því er fram kemur í Morgunblaðinu í dag. Þeir fengu sjö veiðidaga í júní og jafnmarga veiðidaga í maí. Strandveiðibátum hefur fækkað frá því í fyrra, úr 621 í 601.