Hanna Birna: Markmiðið að efla þjónustu

Hanna Birna Kristjánsdóttir innanríkisráðherra segir að tilgangurinn með stærri rekstrareiningum sýslumannsembætta sé að auka og efla þjónustu ríkisins í héraði og skapa aukin tækifæri til þess að færa ný verkefni til sýslumanna.

Það sama gildi um umdæmi lögreglustjóra, þar sem markmiðið sé að auka samhæfingu og samstarf og standa vörð um grunnþjónustu lögreglunnar.

Eins og kunnugt er samþykkti Alþingi síðastliðið vor tvö frumvörp innanríkisráðherra um breytingar á lögum um umdæmaskipan lögreglustjóra og sýslumanna. Með lögunum er embættum sýslumanna fækkað úr 24 í níu og lögregluumdæmum úr fimmtán í níu.

Hanna Birna bendir á að allan þann tíma sem unnið hafi verið að þessu máli hafi ráðuneytið lagt áherslu á náið samráð við hluteigandi aðila, þ.e. embættin sjálf, sveitastjórnir, landshlutasamtök og fleiri. Það samráð hafi gefist vel og málið verið unnið í mikilli sátt.

„Á sama tíma og við gefum aðilum tækifæri til að koma með athugasemdir og ábendingar, stendur yfir ráðningarferli vegna sýslumanna og lögreglustjóra. Í framhaldi af því tekur verkefnisstjórn í hverjum landshluta til við að útfæra tillögur til ráðherra um staðsetningu, fyrirkomulag og framkvæmd.  Ég er sannfærð um að sú vinna mun takast jafn vel og skila jafn miklum árangri og sú sátt sem náðst hefur um þessar mikilvægu breytingar,“ segir hún.

• 1 blogg um fréttina

Bloggað um fréttina

• Óðinn Þórisson: Hanna Birna staðið sig betur en Ögmundur