Dræm laxveiði kemur mönnum í opna skjöldu

Nýjustu laxveiðitölur frá Landssambandi veiðifélaga þykja ekki vera til marks um gott veiðiár og það sem af er sumri hefur veiðst miklu minna af laxi en gengur og gerist í meðalári.

Í umfjöllun um laxveiðina í sumar í Morgunblaðinu í dag segir Óðinn Sigþórsson, formaður Landssambands veiðifélaga, tölurnar í ár koma mönnum gjörsamlega í opna skjöldu.

Hann segir miklar sveiflur í afla á milli ára verðugt rannsóknarefni. Ólíklegt megi teljast að sumarið í ár nái sömu veiðitölum og í meðalári. Sigurður Guðjónsson, forstjóri Veiðimálastofnunar, segir að erfitt sé fyrir vísindamenn að spá um laxveiðina.